Gas noble

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Os gases nobles son un grupo d'elementos quimicos con propiedaz muit parellanas: en condicions estandar, toz son gases inodoros, incoloros y monoatomicos, con una reactividat muit baixa. Os seis gases nobles que se dan en a naturaleza son o helio (He), o neón (Ne), l'argón (Ar), o criptón (Kr), o xenón (Xe), y l'elemento radioactivo radón (Rn).

As propiedaz d'os gases nobles son bien explicatas por as teorias modernas d'a estructura atomica; se considera que a suya capa exterior d'electrons de valencia ye "plena", fendo que tiengan poca tendencia a fer parti de reaccions quimicas, y nomás s'han feito bels poquez centenars de compuestos de gases nobles. Os puntos de fusión y d'ebullición d'os gases nobles son amanatos, y difieren en menos de 10 °C; por ixo, nomás son liquidos en un rango de temperaturas muit reducito.

O neón, l'argón, o criptón y o xenón s'obtienen a partir de l'aire por meyo de metodos de licuefacción de gases y destilación fraccionata. O helio se gosa deseparar d'o gas natural, y o radón s'obtiene d'a desintegración radioactiva de compuestos disueltos de radio.